பிரபுல் படேலுக்கு எதிரான புகார் மீதான நடவடிக்கை விபரம் வெளியிட வேண்டும்: சி.வி.சி.,க்கு உத்தரவு

 " சிவில் விமான போக்குவரத்து துறையை கவனித்தவரும், தற்போதைய, கனரக தொழில்கள் துறை அமைச்சருமான பிரபுல் படேலுக்கு எதிராக, இந்தியன் ஏர்லைன்ஸ் நிறுவன முன்னாள் நிர்வாக இயக்குனர், சுனில் அரோரா தெரிவித்த புகார் மீது, என்ன நடவடிக்கை எடுக்கப்பட்டது என்பதை வெளியிட வேண்டும்' என, மத்திய ஊழல் கண்காணிப்பு ஆணையரை, முதன்மை தகவல் ஆணையர் கேட்டுக் கொண்டுள்ளார்.

சிவில் விமான போக்குவரத்து அமைச்சராக, தேசியவாத காங்கிரசை சேர்ந்த பிரபுல் படேல் இருந்த போது, முறைகேடுகள் நடந்ததாக, இந்தியன் ஏர்லைன்ஸ் நிறுவனத்தில் நிர்வாக இயக்குனராக இருந்த சுனில் அரோரா பிரச்னை கிளப்பியிருந்தார். இது குறித்து, கேபினட் செயலர், பி.கே.சதுர்வேதிக்கு, அரோரா கடிதம் எழுதியிருந்தார் இந்த பிரச்னை குறித்து, விசாரிக்கும்படி, சி.வி.சி., என்ற மத்திய ஊழல் கண்காணிப்பு ஆணையத்திடம், லோக்சபா உறுப்பினர்களான, பிரபோத் பன்டா -- இந்திய கம்யூ மற்றும் நிஷிகாந்த் துபே - பா.ஜ., ஆகியோர் கோரியிருந்தனர். இந்த எம்.பி.,க்கள் மனு மீது ,என்ன நடவடிக்கை எடுக்கப்பட்டது என்பது குறித்து, தகவல் அறியும் உரிமை சட்டத்தின் கீழ், சமூக ஆர்வலர் சுபாஷ் அகர்வால் மனு செய்தார். இதற்கு, மத்திய ஊழல் கண்காணிப்பு ஆணையம், பதில் அளிக்க மறுத்துவிட்டது. இந்த விவகாரம், மீண்டும் முதன்மை தகவல் ஆணையர் வசம் வந்தது.

இதுகுறித்து ஆய்வு செய்த முதன்மை தகவல் ஆணையர், சத்தியானந்தா மிஸ்ரா பிறப்பித்த உத்தரவில் கூறியிருப்பதாவது:கேபினட் செயலருக்கு, அரோரா எழுதிய கடிதம் மற்றும் கேபினட் செயலரிடம் இருந்து வந்த தகவலை, மத்திய ஊழல் கண்காணிப்பு ஆணையம், மனுதாரருக்கு தெரிவிக்க வேண்டும். இந்த விஷயத்தில், பிரபுல் படேலுக்கு எதிரான புகார் மீது என்ன நடவடிக்கை எடுக்கப்பட்டது என்பதை வெளியிட வேண்டும்.இதில், அரோராவின் புகார் பற்றி வெளியிடதேவையில்லை. பொது நலன் கருதி, எம்.பி.க்கள் கோரியுள்ளதற்கு என்ன நடவடிக்கை எடுக்கப்பட்டது என்பதையும், அதன் தொடர் நடவடிக்கை விபரங்களையும், மத்திய ஊழல் கண்காணிப்பு ஆணையம், 15 நாட்களுக்குள் வெளியிட வேண்டும்.இவ்வாறு உத்தரவில் கூறப்பட்டு இருந்தது.

மத்திய சிவில் விமான போக்குவரத்து அமைச்சராக பிரபுல் படேல் இருந்தபோது, ஏர் இந்தியாவுக்கு, தேவையான போயிங் விமானங்கள் வாங்க, அமெரிக்காவின் போயிங் விமான தயாரிப்பு நிறுவனத்துடன் ஒப்பந்தம் போடப்பட்டதில் முறைகேடு நடந்ததாக, எம்.பி.,க்கள் பிரபோத் பன்டாவும், நிஷிகாந்த் துபேயும் புகார் கிளப்பியிருந்தது குறிப்பிடத்தக்கது.

நன்றி தினமலர்

பிரதமர் அலுவலகம் கேட்க கூடாத கேள்வி -ஆர்.டி.ஐ சட்டத்தின் கீழ் எதற்காக தகவல் கேட்கிறீர்கள்

ஆர்.டி.ஐ. சட்டத்தின் கீழ் எதற்காக தகவல் கேட்கிறீர்கள் என்று பிரதமர் அலுவலகம் கேள்வி கேட்டுள்ளது பெரும் சர்ச்சையை ஏற்படுத்தி உள்ளது.  தகவல் அறியும் உரிமைச் சட்ட ஆர்வலரான விமானப்படை முன்னாள் அதிகாரி லோகேஷ் பத்ரா பிரதமர் அலுவலகத்தில் தகவல் கேட்டு மனு ஒன்றை அளித்தார். அதில், தகவல் அறியும் உரிமைச் சட்டப்படி எந்தெந்த தகவல்கள், ஆவணங்கள் கணினிமயமாக்கப்பட்டுள்ளது, டிஜிட்டல்மயமாக்கப்பட்டுள்ளது என்ற விவரத்தை அவர் கேட்டிருந்தார்.  

ஆனால், அந்த தகவலை பிரதமர் அலுவலக பொது தகவல் அதிகாரி ரிஸ்வி தர மறுத்துவிட்டார். இதை தொடர்ந்து லோகேஷ் பத்ரா மேல் முறையீடு செய்தார். இதை விசாரித்த மேல் முறையீட்டு அதிகாரியான கிரிஷண் குமார் தகவல்களை 15 நாட்களுக்கு தர ரிஸ்விக்கு உத்தரவிட்டார். இந்த முறை தனது பதிலில், ''நீங்கள் எதற்காக இந்த தகவல்களை கேட்கிறீர்கள். அது உங்களுக்கு எந்த வகையில் பயன் அளிக்கும் என்று விளக்குங்கள்'' என்று குறிப்பிட்டுள்ளார். 

இது சர்ச்சையை ஏற்படுத்தி உள்ளது. இது குறித்து முன்னாள் தலைமை தகவல் ஆணையர் ஏ.என்.திவாரி கூறுகையில், ''தகவல் அறியும் உரிமைச் சட்டத்தின்படி கேட்ட தகவல்களை தர வேண்டியது மட்டுமே பொது தகவல் அதிகாரியின் கடமை. அது ரகசியமான தகவல் என்றால் மட்டுமே தர மறுக்கலாம். எதற்காக தகவல் கேட்கிறீர்கள் என்று பதில் கேள்வி கேட்க அதிகாரம் இல்லை. இதற்காக பொது தகவல் அதிகாரி மீது நடவடிக்கை எடுக்கலாம்'' என்றார். 

நன்றி தினகரன்

தகவல் அறியும் உரிமை சட்டம்: ஆய்வு நடத்த மத்திய அரசு முடிவு

தகவல் அறியும் உரிமைச் சட்டம்  எந்தளவுக்கு செயல்படுத்தப்படுகிறது, அதை மேலும் எவ்வாறு பலப்படுத்தலாம் என்பதை மதிப்பீடு செய்ய, மத்திய அரசு ஆய்வு ஒன்றை நடத்தவுள்ளது.

தகவல் அறியும் உரிமைச் சட்டம் 2005-ஆம் ஆண்டு கொண்டு வரப்பட்டது. அரசின் செயல்பாடுகள் வெளிப்படையாகவும், பொறுப்புடனும் நடைபெற வேண்டும் என்ற குறிக்கோளுடன் இந்த சட்டம் கொண்டுவரப்பட்டது.

இந்த சட்டத்துக்கு பொதுவாக வரவேற்பு உள்ளதால், இதை மேலும் சிறப்பாக செயல்படுத்த மத்திய அரசு முனைந்துள்ளது. இதற்காக, இந்த சட்டம் இதுவரை எந்தளவுக்கு செயல்படுத்தப்பட்டுள்ளது.

மக்களுக்கு எந்தளவுக்கு பயனளித்துள்ளது என்பதை மதிப்பீடு செய்வதற்காக, ஒரு ஆய்வை மேற்கொள்ள அரசு திட்டமிட்டுள்ளது. இந்த ஆய்வு முழு அளவில் நடத்தப்பட உள்ளது. ஆறு முதல் ஒன்பது மாதங்களில் இந்த ஆய்வை நடத்தி முடிக்க கால நிர்ணயம் செய்யப்பட்டுள்ளது.

தகவல் அறியும் உரிமைச் சட்டத்தை மக்கள் எந்தளவுக்கு அறிந்து வைத்துள்ளனர். இந்த சட்டத்தால் எந்த அளவுக்கு லஞ்சம்-ஊழல் குறைந்திருக்கிறது. தகவல்களை அளிப்பதில் அரசுக்கு ஏற்படும் செலவு உள்ளிட்ட பல்வேறு அம்சங்கள் குறித்து ஆய்வு நடத்தப்பட உள்ளது. தவிர, தகவல் அறியும் உரிமைச் சட்டம் செயல்படுத்தப்படுவதில் எந்தளவுக்கு மக்களுக்கு திருப்தி ஏற்பட்டுள்ளது.

மக்கள் எந்த வகையான தகவல்களை அதிகமாக கேட்டுப்பெற்றுள்ளனர். அரசு நிர்வாகத்தின் பல்வேறு நிலைகளில் உள்ளவர்களுக்கு கிடைத்த அனுபவம். தகவல் உரிமைச் சட்டத்தின் கீழ் தாக்கல் செய்யப்படும் விண்ணப்பங்கள் மற்றும் வேண்டுகோள்கள் குறித்த போக்கு பற்றியும் விவரங்கள் கேட்டுப்பெற உள்ளன.

தகவல்கள் கேட்பு மற்றும் தகவல்கள் அளிப்பு என்ற இரண்டு நிலைகளிலும், இந்த சட்டத்தை மேலும் பலப்படுத்த, இந்த ஆய்வுகள் உதவும் என்று நம்பப்படுகிறது.

கோரிக்கைகளுக்கு நியாயமாகவும், விரைவாகவும் தகவல்களை அளிக்க, இந்த சட்டத்தை கையாளும் பொதுத் தகவல் அதிகாரிகளுக்கு பயிற்சி அளிப்பது பற்றியும் ஆலோசிக்கப்படும்.

இந்த ஆய்வானது மத்திய மற்றும் மாநில அரசுகளின் பல்வேறு துறைகள் மற்றும் மத்திய, மாநில, மாவட்ட, பஞ்சாயத்து நிர்வாகங்கள் நிலையிலும் நடைபெறவுள்ளது. இந்த சட்டம் குறித்து, கருத்து மற்றும் தகவல் தெரிவிக்க விரும்பும் நிறுவனங்கள், இம்மாதம் 28-ஆம் தேதிக்குள் பதில் அளிக்கலாம் என்று மத்திய பணியாளர் மற்றும் பயிற்சித் துறை அறிவித்துள்ளது.

தகவல் உரிமை ஆர்வலருக்கு நச்சு ஊசிக்குத்து

தகவல் அறியும் உரிமை ஆர்வலர் என். சீனிவாசராவ் மீது அடையாளம் தெரியாத மூன்று நபர்கள் நச்சுப்பொருள் கொண்ட ஊசியைக் கொண்டு தாக் குதல் நடத்தினர்.பிரகாசம் மாவட்டத்தில் உள்ள மர்கா பூர் நகரில் இச்சம்பவம் நடந்தது. ஊசியால் குத்தப்பட்ட வுடன் சீனிவாச ராவ் மயக் கம் அடைந்து விழுந்தார். அவரை உடனடியாக மர்கா பூர் பகுதியில் உள்ள மருத் துவமனைக்கு தூக்கிச்சென் றனர். பின்னர் அவர் அங்கி ருந்து ராஜீவ் காந்தி மருத் துவ அறிவியல் கல்விக்கழக மருத்துவமனைக்கு எடுத் துச்செல்லப்பட்டார். வன் கொடுமை தடுப்புச் சட்டத் தின் கீழ் அவருக்கு எதிராக மர்காபூர் நீதிமன்றத்தில் வழக்கு விசாரணைக்கு வரு வதற்கு முதல் நாள் இத்தாக் குதல் நடந்துள்ளது.தகவல் உரிமை ஆர்வல ரின் ரத்த அழுத்தம், சுவாசத் துடிப்பு உள்ளிட்ட உடல் நல அறிகுறிகள் இயல்பாக உள்ளன என்று அவருக்கு சிகிச்சை அளித்து வரும் மருத்துவர் ராஜேஸ்வர ராவ் கூறினார். அவர் தெளிவின்றி காணப்படுகிறார். ஆனால் வார்த்தைகளில் அழைத் தால் அவர் எதிர்வினை யாற் றுகின்றார் என்றும் அவர் சொன்னார். தொடக்க நச்சுப்பொருள் சோதனை களில் நச்சுப்பொருள் எது வும் சுட்டிக்காட்டப்பட வில்லை என்று மாவட்ட காவல்துறை கண்காணிப் பாளர் கே.ரகுராம் ரெட்டி கூறினார்.ஹைதராபாத்தில் உள்ள தடயவியல் சோதனைச்சா லைக்கு ரத்தமாதிரிகள் விரிவான சோதனைக்காக அனுப்பப்பட்டுள்ளன என் றும் அவர் தெரிவித்தார். வருவாய்த்துறை மற்றும் காவல்துறை அதிகாரிக ளுக்கு எதிராக சீனிவாச ராவ் தகவல் அறியும் உரி மைச் சட்டத்தைப் பயன் படுத்தி வருகிறார். மேலும் தன்னுடைய உயிருக்கு ஆபத்திருப்பதாக அவர் புகார் தெரிவித் துள்ளார். 

சமூக ஆர்வலர்களின் உயிருக்கு பாதுகாப்பு இல்லை

இந்தியாவில், சமூக ஆர்வலர்களின் உயிருக்கு பாதுகாப்பு இல்லை; அதற்கு எடுத்துக்காட்டு, திருவண்ணாமலையில், சமூக ஆர்வலர் படுகொலை செய்யப்பட்டது என, தகவல் அறியும் உரிமைச் சட்ட ஆர்வலர் பலர், வேதனை தெரிவித்துள்ளனர். திருவண்ணாமலையில், சமூக சேவகரான ராஜ்மோகன், கடந்த 2ம் தேதி, படுகொலை செய்யப்பட்ட சம்பவம், தமிழகத்தில் சமூக சேவையில் ஈடுபடும் பொதுநல ஆர்வலர் மத்தியில், பெரும் அதிர்ச்சியை ஏற்படுத்தியது. இதுகுறித்து, தகவல் அறியும் உரிமைச் சட்டத்தின் மூலம், பல்வேறு முறைகேடுகளை வெளிக் கொண்டு வந்தவரான, ஆவடி தரணிதரன் கூறுகையில், ""ராஜ்மோகன் படுகொலை செய்யப்பட்டது, இந்தியாவில் ஜனநாயகம் படுகொலை செய்யப்பட்டுக் கொண்டிருக்கிறது என்பதற்கான எடுத்துக்காட்டு. இச்சட்டம் எதற்காக கொண்டு வரப்பட்டதோ, அந்த நோக்கத்தை சீர் குலைப்பதற்கு தொடர்ந்து சதி நடந்து கொண்டிருக்கிறது,'' என்றார்.

தொடரும் உயிர் பலி: தகவல் அறியும் உரிமைச் சட்டம் கொண்டு வரப்பட்டதில் இருந்து, இன்று வரை, 50க்கும் மேற்பட்டோர் கொல்லப்பட்டு உள்ளனர். இதில், தமிழகத்தைச் சேர்ந்த மூன்று பேரும் அடக்கம். நூற்றுக்கணக்கானோர் படுகாயம் அடைந்துள்ளனர். தகவல் அறியும் உரிமைச் சட்டத்தில், பல்வேறு கேள்விகள் கேட்டதால், 

கடுமையாக தாக்கப்பட்டவரான சந்தானம் கூறியதாவது: இந்தியாவில், விரல் விட்டு எண்ணக்கூடிய அளவிலேயே, தகவல் அறியும் ஆர்வலர்கள் உள்ளனர். அவர்களின் உயிரை காப்பாற்ற வேண்டியது, அரசின் கடமை. அரசு கொடுத்த உரிமையை, நாங்கள் பயன்படுத்துகிறோம். அது, தவறு செய்கிறவர்களுக்கு பாதகமாக அமைந்தால், நாங்கள் எதுவும் செய்ய முடியாது. இந்தியாவில், அரசியல்வாதிகளையும், காவல்துறையையும் நம்ப முடியாது. துப்பாக்கியின் இரண்டு குழல்கள் அவர்கள். எனவே, பொதுமக்களுக்காக உழைக்கும் சமூக ஆர்வலர்களை, பொதுமக்களே பாதுகாக்கவேண்டும். இவ்வாறு அவர் கூறினார்.

நிவாரண நிதி: பாதுகாப்பு வழங்குவது குறித்து, பல்வேறு ஆர்வலர்கள் கூறியதாவது: சமூக ஆர்வலர்களின் உயிருக்கும், உடமைக்கும் எந்த அச்சுறுத்தல் வந்தாலும், இதுகுறித்து தீவிர விசாரணை வேண்டும். குறிப்பாக, அவர்களின் குடும்பத்திற்கும் பாதுகாப்பு கொடுக்க வேண்டும். தகவல் கேட்பவரால் யாரெல்லாம் பாதிப்படுகின்றனர் என்பதை அறிய வேண்டும். சமூக விரோதிகளால் கொலை செய்யப்பட்ட ராஜ்மோகன் குடும்பத்திற்கு, நிவாரண நிதி வழங்க வேண்டும்; தனிமையில் இருக்கும் அவருடைய மனைவியின் உயிருக்கு பாதுகாப்பு வழங்க வேண்டும். இவ்வாறு அவர்கள் கூறினர்.